Bloggfærslur mánaðarins, september 2012

Mikilvægar upplýsingar

Núverandi ríkisstjórn hefur reynst fram úr öllum vonum. Þrátt fyrir ýms mistök þá hefur hún átt þátt í að koma þjóðarskútunni aftur á flot eftir hörmulega stjórn hennar í aðdraganda hrunsins með einkavæðingu bankanna og Kárahnjúkavirkjunundir frjálshyggjuplágunni sem bæði áttu mikinn þátt í hryllilegri hremmingum í sögu nokkurrar þjóðar á friðartímum.

En við erum nú komin aftur á flot og það er aðalatriðið.

Meginféndur ríkisstjórnarinnar eru eftir sem áður fulltrúar braskara og fjárglæframanna sem reyna allt hvað þeir geta til að draga úr vinsældum ríkisstjórnarinnar.

Það er því mjög mikilsvert að ríkisstjórnin upplýsi alla sem vilja það sem sannast er, betur hvernig ástandið raunverulega er.

Með bestu kveðjum og von um að okkur takist að gera þá sem ábyrgð bera á hruninu, ábyrga að refsilögum fyrir þann hátt sem þeir eiga þátt í hruninu mikla.

Góðar stundir!  


mbl.is Loforð og efndir ríkisstjórnarinnar
Tilkynna um óviðeigandi tengingu við frétt

Skynsamleg tillaga

Framkomin tillaga er mjög skynsamleg.

Fyrir nær 60 árum vildi meirihluti hreppsnefndar þáverandi Kópavogshrepps leita sameiningar við Reykjavík. Þá stóðu málin þannig að forystufólk sveitarfélagsins vildi fá sem fyrst þjónustu fyrir hreppsbúa. Bæjarstjórn Reykjavíkur tók þessu erindi illa, alla vega þáverandi meirihluti Sjálfstæðismanna sem óttaðist að missa meirihluta sinn í næstu kosingum enda talið að „tómir kommar“ byggju í Kópavogi. Þeir vildu hins vegar styðja Kópavogsbúa að stofna sérstak sveitarfélag. og varð Kópavogskaupsstaður til 1955. Þetta varð afdrifaríkur vendipunktur.  Í stað þess að sveitarfélögin á höfuðborgarsvæðinu yrðu sameinuð, var byggt upp nokkurs konar smákóngaveldi.

Við þekkjum söguna síðan. „Smákóngaveldið“ hefur fengið að þróast hvert á sínum forsendum. Þannig hefur hvert sveitarfélag þróast á sinn hátt án þess að sjónarmið og hagsmun ir heildarinnar hafi fengið að ráða för. Þannig eru fyrir vikið „múrar“ milli bæjarfélaga. Má nefna sunnanvert Breiðholt í Reykjavík og Kópavogs þar sem engar samgöngur eru á milli sveitarfélaganna.

Hræðsla Sjálfstæðisflokksins að missa meirihluta og þar með völd hafa sett sitt mark á söguna. Því miður! En nú er komið til sögu ungt og víðsýnt fólk sem vill taka á þessum málum sem vill breytingar og ber að fagna því.

Góðar stundir!


mbl.is Vilja sameina sveitarfélög
Tilkynna um óviðeigandi tengingu við frétt

Vissi hann eða mátti vita?

Auðvitað er Baldri í fullum rétti að setja fram athugasemdir.

En varðandi sölu á viðskiptabréfum sínum þá er líklegt að hann vissi eða mátti vita um breytingu sem vænta mátti á verðmæti þeirra. Sem fyrrum ráðuneytisstjóri hafði hann víðtækan vinahóp m.a. innan viðskiptaheimsins þar sem menn hafa rætt saman og skipst á upplýsingum.

Þeir sem keyptu á hærra verðinu hafa að öllum líkindum vilja að rifta kaupum sínum enda er mjög líklegt að Baldur vissi eða mátti vita að bréfin væru minna virði eftir að hann seldi.


mbl.is Baldur gerir athugasemdir við Kastljós
Tilkynna um óviðeigandi tengingu við frétt

Verðum að tengjast stærra efnahagskerfi

Dvergríkið Ísland reynir að halda uppi sjálfstæðum gjaldmiðli. Síðan 1886 eða frá stofnun Landsbankans hefur íslenska krónan ávallt verið litin hornauga og ekki talin vera með þeim myntum sem óskað er eftir viðskiptum með. Upphaflega krónan var aðeins gildur gjaldmiðill innanlands og kaupmenn vildu hana ekki í viðskiptum.

Efnahagslega, viðskiptalega og ekki síst menningarlega sem stjórnmálalega erum við best tengd Evrópu og eigum að vera hluti af Efnahagssambandinu en á OKKAR forsendum. Við verðum að halda uppi sjónarmiðum og skilyrðum fyrir inngöngu. Við eigum þannig að fá fulla viðurkenningu yfir landhelginni og að landbúnaður okkar njóti þess að við erum að halda uppi góðri framleiðslu sem að mestu er laus við erfiða sjúkdóma. Bændur okkar verða að geta keppt við starfsfélaga sína í Evrópu af sanngirni og réttum forsendum. Kraftfóður er framleitt í Afríku með lágmarkstilkostnaði fyrir landbúnað í löndum Evrópusambandsins. Sú staðreynd skýrir mun lægri framleiðslukostnað og þar með betri möguleikum á markaði.

En við erum ekkert á leiðinni inn í Evrópusambandið meðan við getum ekki uppfyllt Maastrickt skilyrðin. Við verðum að byrja á því að uppfylla þau og það tekur nokkur ár enn.

Örkrónan okkar á betur heima í myntsöfnum en í umferð hér á landi. Við verðum að fá betri gjaldmiðil.

Góðar stundir!


mbl.is Verkefnið að bæta umgjörð krónunnar
Tilkynna um óviðeigandi tengingu við frétt

Er of mikill hagvöxtur rányrkja?

Eitt vinsælasta hugtak meðal hagfræðinga er orðið hagvöxtur. Það hefur aldrei verið almenilega útskýrt en stjórnmálamenn klifa bæði seint og snemma á þessu orði og taka það feginshendi þegar hagfræðingar mæla hærri hagvöxt en árið á undan.

En er hagvöxtur byggður á rányrkju? Eða má spyrða saman hagvöxt og rányrkju? Með rányrkju er sagt að þá er tekið meira frá náttúrunni en hún er tilbúin að gefa af sér.

Á miðöldum gerðu menn skýran mun á náttúrulegum arði og borgaralegum. Sá náttúrulegi var arðurinn af akrinum, skóginum, skepnunum, fiskurinn í vötnum, ám og sjónum. Borgaralegi arðurinn byggðist fyrst og fremst á vöxtum sem voru oft mjög breytilegir og ekki alltaf í samræmi við náttúrulega arðinn.

Afgjald eða leiga jarða miðaðist gjarnan við 10% af arðinum sem oft var kannski einnig 10% af verðmæti jarðarinnar. Þannig varð leigan 1% af verðmæti jarðarinnar. Með þetta í huga gerði kaþólska kirkjan mun á arðseminni. Sá náttúrulegi var guði þóknanlegur en sá borgaralegi syndsamlegur. Sagt er að Gyðingar hafi tekið þetta eins og hvert annað viðskiptatækifæri eins og það myndi vera kallað nú á dögum.

Eitt mjög skýrt dæmi um áhugaleysi fyrir sjónarmið borgaralegs arðs:

Talið er að skógrækt á Íslandi geti gefið af sér 3-4% en falli fyrst og fremst við síðustu fellingu skógarins, kannski ekki fyrr en eftir 70-80 ár!

Þetta hefur lengi legið ljóst fyrir. Þeir sem vilja sem mestu arðsemi finnst þetta ekki vera ásættanlegt undir neinum kringumstæðum og því skógrækt sögð vera eins og hvert annað dútl. 7-10% arðsemi er jafnvel sagt vera lágmark.

Það er í þessum mun sem skilur á milli rányrkju og eðlilegrar notkunar. Hagvöxturinn er meiri eftir því sem arsemiskrafan hækkar og þar með rányrkjan.

Hér er sett fram áleitin spurning sem gaman væri að ræða.

Góðar stundir!


Hvað varð um þingræðið á Íslandi?

Þegar Ólafur Ragnar tók vitlausustu ákvörðun sína að undirrita ekki Icesave samkomulagið, greip hann fram fyrir þingræðið á Íslandi. Allt í einu var þingræði ekki lengur við lýði heldur forsetaeinræði.

Samkomulagið við Breta og Hollendinga gekk út á að ef 7% skuldarinnar greiddist ekki af höfuðstól skuldarinnar og öll útistandandi lán gamla Landsbankans yrðu afskrifuð þá gæti farið svo að þjóðin yrði ábyrg. Þá höfðu 93% Icesaveskuldarinnar skilað sér og er varðveitt á vaxtalausum reikning í vörslum Englandsbanka. En fjarri fer því að öll útistandandi lán verði afskrifuð og enn er að skila sér fé inn á reikninginn í Englandsbanka.

Það var ljóst að 93% skuldarinnar var komið í hús.

Með þessari vitlausu leið ákvað ÓRG að grípa fram fyrir þingræðið, 70% þingsins vildi semja við Breta og Hollendinga og ljúka þessu máli í eitt skipti fyrir öll og það væri þetta leiðindamál að öllum líkindum úr sögunni núna. Setja má fram spurningu : ákvað ÓRG að leika sér dálítið með valdið með því að  þoka þingræðinu til hliðar til að auka vald sitt. Icesavemálið var sett inn í einhvern tilfinningaríkan taradal sem verður sagnfræðingum framtíðarinnar sennilega mikið viðfangsefni.

Ljóst er, að hefði ÓRG undirritað lögin um Icesave þá væri þessir erfiðleikar að baki. Við hefðum strax notið betri lánskjara erlendis en erum núna að endurfjármagna gömul lán á óhagstæðari kjörum en tilefni var til.

Með erfiðum og langvinnum málaferlum mælti enginn ábyrgur lögmaður. Þau eru dýr, meira að segja rándýr, settar eru fram ítrustu kröfur sem geta leitt til verri og ósanngjarnari niðurstöðu en sú fyrri leið sem stjórnvöld vildu með 70% þingsins að baki sér.

Spyrja má: Hvað varð um þingræðið á Íslandi? Eigum við von á því að ÓRG haldi áfram að leika sér að valdinu í nánustu framtíð meðan hann þrásitur á Bessastöðum?

Góðar stundir!


mbl.is Segir ESB tapa sama hvernig málið fari
Tilkynna um óviðeigandi tengingu við frétt

Þegar reiðin stjórnar för

Stefnandi var lengi tengdur spillingunni í Framsóknarflokknum og komst yfir gott viðskiptatækifæri til að auðga sjálfan sig og sína. Töluvert var um þessi mál rætt á sínum tíma. Teitur bloggari fór að rifja þessi mál upp og kallaði reiði braskarans yfir sig. Nú mætti vitna í Jón byskup Vídalín: „Reiðin er eitt aldeilis reiðarslag. Sá sem reiður er, er vitlaus“. Reiðin kemur oft mönnum til að gera eitthvað, jafnvel bæta gráu ofan á svart og gera illt verra.

Auðvitað eru málaferli af þessu tagi kjörin tækifæri að rifja sitt hvað upp sem ekki má annars ræða.

Því miður hafa aldrei verið settar siðareglur yfir þingmenn og hvernig þeim beri að haga sér gagnvart samborgurum sínum.

Lengi lifi mannréttindin og tjáningarfrelsið á Íslandi! 


mbl.is Niðurstaðan kemur ekki á óvart
Tilkynna um óviðeigandi tengingu við frétt

Þegar gömlum húsum er breytt í hótel

Eitt mjög mikilvægt er að hafa í huga þegar gömlum húsum er breytt er að tryggja góða aðkomu. Svo virðist sem þetta mikilvæga atriðið hafi of oft gleymst. Sem reynslumaður í ferðaþjónustunni er ekki auvelt að koma með rútu að sumum þessara gömlu húsa. Sem dæmi má nefna Laugaveg 22 þar sem áður var verslunin Fálkinn en nú Hótel Frón. Ekki er heimilt að aka rútu niður Laugaveginn og því þarf að skila farþegum eða sækja með því að stoppa rútuna í næstu götu með tilheyrandi töfum. Annað dæmi er Hótel Plaza í Aðalstræti 4. Þar er stæði leigubíla og bílsstjórar þeirra ekki par hrifnir ef rútu er lagt í stæði þeirra ef laust er. Sama má segja um Hótel Borg, þar er aðkoma mjög aðfinnanleg vegn þrengsla. Á horni Hverfisgötu og Klapparstíg er Hótel Klöpp. Ekki er auðvelt að stoppa rútu þar fyrir utan á þessu þrönga umferðarhorni.

Svo eru menn með hugmyndir um að breyta stórum byggingum eins og Landsímahúsinu og koma fyrir stórfelldum hótelrekstri án þess að aðkoma sé nægjanlega trygg. Miðbærinn er vandræðagististaður vegna vondrar aðkomu. Fyrir rútubílsstjóra er mikill höfuðverkur og einnig okkur leiðsögumenn að koma með eða sækja farþega á þessi hótel.

Góðar stundir!


mbl.is Breyta Hverfisgötu 21 í hótel
Tilkynna um óviðeigandi tengingu við frétt

Upplýsingaþjónusta vildarvina?

Í aðdraganda hrunsins virðist sem valdaklíkan og vildarvinir hafi fengið betra upplýsingastreymi en aðrir. Þannig fóru fram viðskipti með hlutabréf fyrir réttum 4 árum þar sem auðmenn náðu að losa sig við verðlítil hlutabréf.

Baldur Guðlaugsson seldi hlutabréf sín í Landsbankanum rétt upp úr miðjum sept. 2008 og sömu daga seldi Örn Andrésson sín hlutabréf í Atorku. Það leiddi til falls þess almenningsfyrirtækis nokkru síðar.

Guðlaugur Þór var iðinn við að afla fjár í kosningasjóð sinn. Honum varð furðu vel ágengt. Er hann kannski enn að afla fé í sjóðinn fyrir næstu kosningar? Guðlaugur Þór virðist koma víða við sögu þar sem safaríkar fréttir eru af einhverju tengdu braski og fjármálum. Hann átti sinn þátt í að grafa undan Gunnari Andersen fyrrum forstjóra Fjármáleftirlitisins sem virðist hafa fundið eitthvað bitastætt gegn Guðlaugi Þór. Því miður beitti hann ekki réttri aðferð að afla nánari upplýsinga eftir þeim leiðum sem Fjármálaeftirlitinu er heimilt að fara. Því varð það sem athugun beindist að slapp og enn er hann að „sprikla“. Þar sem Guðlaugur Þór er, má reikna með ýmsu misjöfnu. Hann virðist koma víða við sögu og spurning hvort hann tengist eitthvað þessu einkennilega máli hvort Deutsche Bank hafi fengið heimild að losa þetta mikla fé úr þeim festum sem gjaldeyrishöftin eiga að halda gagnvart öllum.

Spurning er: Í hvaða fyrirtækjum er Guðlaugur Þór ekki flæktur að meira eða minna leyti? Sjálfstæðisflokkurinn og Framsóknarflokkurinn hafa lengi verið talin ein verstu spillingarbæli landsins.

Nægir að vísa á að á þingi sitja nokkuð margir fyrir þessa flokka sem flæktir hafa verið í spillingarmál af misjöfnu tagi.


mbl.is Brýnt að málið sé upplýst sem fyrst
Tilkynna um óviðeigandi tengingu við frétt

« Fyrri síða | Næsta síða »

Um bloggið

Siðvæðing í stjórnmálum

Höfundur

Guðjón Sigþór Jensson
Guðjón Sigþór Jensson

BA í bókasafns- og upplýsingafræði frá Félagsvísindadeild HÍ. Próf frá Leiðsöguskóla Íslands 1992.  Áhugamaður um félagsmál, sagnfræði, orkumál, náttúrufræði og umhverfismál. Átti þátt í að stofna Umhverfis- og náttúrufræðifélags Mosfellsbæjar  (stofnað 2007) og var fyrsti formaður til nóv. 2010.

Hef búið í Mosfellsbæ síðan í janúar 1983.

Bloggvinir

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • IMG_1616
  • Frá Svörtu gljúfrum Gunnison þjóðgarði
  • Bútur af járnbrautarteinum?
  • ...259_1074252
  • ...259_1074251

Heimsóknir

Flettingar

  • Í dag (29.3.): 0
  • Sl. sólarhring: 1
  • Sl. viku: 9
  • Frá upphafi: 0

Annað

  • Innlit í dag: 0
  • Innlit sl. viku: 9
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband