Bloggfærslur mánaðarins, apríl 2010

Virðingaverð hvatning

Byskupinn okkar hvetur sóknarpresta og djákna að kaupa skýrsluna um bankahrunið. Sjálfsagt hafa Íslendingar sjaldan eða jafnvel aldrei staðið frammi fyrir jafnmiklum erfiðleikum vegna þessara gríðarlegu umskipta í sögu sinni. Þá var bönkunum breytt í ræningabæli í aðdraganda hrunsins og siðleysi alls ráðandi.

Sem yfirsálnahirðir þorra þjóðarinnar þá vill byskupinn okkar greinilega hvetja undirmenn sína til umræðu um þessi mál. Til þess að sú umræða verði byggð sem mest á rökum þá kemur þessi hvatning til, að gera skýrsluna sem mest aðgengilega fyrir sem flesta. Þá er meira en líklegt að sem flest og vonandi öll bókasöfn landsmanna hafi frammi eintak, bæði til afnota á söfnunum sem og til útláns.

Herra byskup Karl Sigurbjörnsson á allt lof skilið. Þökk sé víðsýni hans.

Mosi

Post scriptum: Sjálfsagt rekur einhvern í rogastans að hnjóta um orðið byskup ritað með „y“. Áhöld eru um hvort er upprunalegra en afburða fræðimenn á borð við Jón Sigurðsson (1811-1879) og Pál Eggert Ólason (1883-1949) rituðu að jafnaði „byskup“ en ekki „biskup“. Að sjálfsögðu má rökræða lengi um hvort sé réttara og upprunalegra í íslenskri málnotkun.


mbl.is Söfnuðir kaupi rannsóknarskýrslu
Tilkynna um óviðeigandi tengingu við frétt

Tillaga að nafni á nýja eldfjallið

Nokkru austan við Heklu eru Rauðfossafjöll og eru nyrstu upptök Markarfljóts í suðurhlíðum þeirra fjalla. Á dómadalsleið blasir við mikill og fagur rauðleitur foss, Rauðfoss og svipar nokkuð til Fjallsfoss eða Dynjanda í Arnarfirði þar sem hann breiðir úr sér til hliðanna eftir því sem vatnið rennur niður hallann.

Hraunin frá nýja fjallinu renna niður mikinn halla og mynda hraunfossa, stundum tvo og jafnvel fleiri hverju sinni er á er horft. Að sumu leyti má sjá líkingu þeirra við Hraunfossa í ofanverðum Borgarfirði þar sem Norðlingafljót rennur undir hrauninu ofan á tiltölulega vatnsþéttu lagi og streymir fagurlega út í Hvítá móts við Gilsbakka á Hvítársíðu.

Nú er spurning hvort ekki mætti nefna nýja eldfjallið Hraunfossafell eða Hraunfossafjall. Ef fleiri en eitt fjall myndast í gosi þessu má þess vegna nefna þau Hraunfossafjöll. Þar koma líkingar við Hraunfossana í Borgarfirði og Rauðfossafjöll á afrétti Ranæinga.

Nafnið hefur þann augljósa kost að vera þjált í munni og auðvelt til þýðingar á erlend tungumál.

Tillögu þessari er hér með komið á framfæri öllum hlutaðeigandi til frekari skoðunar.

Vinsamlegast farið varlega við gosstöðvarnar!

Mosi


Gúrkutíð hjá þýsku æsifréttablaði

Vísað er í þýska æsifréttablaðið Bild. Þarf að ræða meira um það?

Greinilegt er að gúrkutíð er á þeim bæ og þá þykir sjálfsagt að tjalda öllu tiltæku til að halda vitleysunni að lesendum.

Mosi


mbl.is Hitti langömmu á himnum
Tilkynna um óviðeigandi tengingu við frétt

Afvopnun mætti ganga lengra

Fátt gleður friðsamt fólk jafnmikið og þegar fréttist af friðsamlegum viðræðum gömlu hervaldanna sem leiðir til afvopnunar. Vopnaskak í hvers konar mynd sem er, dregur úr kúgun og misrétti. Í vopnabúnaði liggur gríðarlegir fjárhagslegir fjármunir sem betur er varið í friðsamlegum tilgangi, að efla samfélagslega samneyslu, aukinnar menntunar, heilbrigðis og annað áþekkt.

Frægt er í sögunni þegar þýska auðvaldið sameinaðist að efla Adolf Hitler og nasistaflokk hans til valda. Síðara hluta árs 1932 var haldinn leynifundur með fulltrúum þýsku júnkaranna, landeigendaaðalsins prússneska, Krupp stáliðjunnar, yfirmanna herráðsins og þýsku nasistanna. Þar var samstarfssamningur þessara skuggalegu afla innsiglaður að veita Adolf og félögum hans brautargengi. Þýsk stjórnmál voru í upplausn enda allt gert til að grafa undan Weimarlýðveldinu sem þessir aðilar fundu flest til foráttu. Þessi þróun endaði með skelfingu sem kunnugt er.

Eftir stríð var það hernaðarauðvaldið í Bandaríkjunum sem kynnti undir Kalda stríðið. Rússneski kommúnistaflokkurinn var litlu betri nema síður sé. Í báðum löndunum máttu þúsundir sæta margs konar mannréttindabrotum. Núna er flest orðið gegnsærra og mannréttindi betur virt þó margt megi fullyrða að enn sé töluvert langt í land.

Nýjasti samningur forseta BNA og Rússlands er á réttri leið. Fjármunir sem sparast verða betur nýttir í þágu samfélagsleganna beggja, til að byggja upp betra heilbrigðiskerfi (einkum í BNA) og aukinna mannréttinda.

Vonandi heldur þessi þróun áfram og að alþjóðasamfélagið megi horfa fram á friðsamlegri samskipti milli allra þjóða.

Mosi

 


mbl.is Forsetar skrifa undir
Tilkynna um óviðeigandi tengingu við frétt

Sektum Bretana!

Sjálfsagt er að yfirvöld kalli Breta þá fyrir sem sinntu ekki opinberum fyrirmælum að halda sig a.m.k. 1000 metra fjarlægð frá gosstöðvunum og beiti sektum fyrir að sinna ekki þessum eðlilegu fyrirmælum.

Það á ekki að skipta neinu þó svo jarðfræðingur hafi verið með í för enda það engin trygging fyrir því að „ekkert komi fyrir“!

Ef yfirvöld beita ekki viðurlögum eru það skýr skilaboð að þau taki á þessu með léttúð og ætli sér ekki að beita sér í þessu.

Ekkert er jafn nauðsynlegt og nú að sýna fyllstu varkárni. Bretarnir sýndu af sér mikla léttúð og er það sérstaklega dapurlegt í skugga skelfilegs slyss nokkru norðar á svipuðum tíma.

Kæruleysi á aldrei að líðast!

Mosi


mbl.is Top Gear ók upp á heitt hraun
Tilkynna um óviðeigandi tengingu við frétt

Fyrirhyggja og góður undirbúningur ferða er alltaf nauðsynlegur

Þetta slys er mjög sorglegt sérstaklega þegar haft er í huga að auðvelt hefði verið að koma í veg fyrir það. Þessi atbrður minnir okkur óþyrmilega á hversu ætíð brýnt er að vera með góðan útbúnað bæði vistir og skjólgóð og hlý föt og skótau. Þarna voru engir „unglingar“ eða útlendingar á ferð og fullljóst að viðkomandi hafi sýnt af sér allt of mikla léttúð og fyrirhyggjuleysi gagnvart þeim erfiðu aðstæðum sem þarna voru til staðar og slæma veðrinu sem hafði verið varað við.

Spurning er hvort fólk hefði farið varlegar ef það hefði vitað að það þyrfti að borga fyrir útkall björgunarsveita og sett hafi verið upp gjaldskrá? Kannski að það kynni að halda aftur af fólki að fara út í vanhugsaðar ævintýraferðir ef því væri fyllilega ljóst að það þyrfti að greiða fyrir þessa þjónustu björgunarsveita eins og er t.d. hjá Svissurum.

Hvað ætli þessi leit hafi kostað? Það hlýtur að vera töluverður samfélagslegur kostnaður að senda á 3ja hundrað manns til erfiðrar leitar ásamt þyrlu.

Nú var fólkið í ökutæki sem tæplega getur talist vera það heppilegasta að fara um erfiðar leiðir, óbrúaðar ár og fjallveg. Sjálfsagt hefur ókunnugleiki spilað þarna inn í.

Kaldhæðni örlaganna er að símasamband var óvirkt á þessu svæði vegna þess að framkvæmdum var ekki lokið.

Aðstandendum er vottuð innileg samúð. Við verðum að draga lærdóm af þessu en fordæmum eigi.

Mosi


mbl.is Rannsókn að hefjast
Tilkynna um óviðeigandi tengingu við frétt

Hvenær verður slys?

Um þetta leyti árs er fremur lítið í jökulánum. Fyrrum var farið úr Fljótshlíðinni þvert yfir Markarfljót fyrir innan Þórólfsfell og innundir Fauskheiði og stefnt á Húsadal. Þessi leið er mjög sjaldan farin í dag enda óðs manns æði að fara hana akandi hvað þá gangandi.

Hvað ef maðurinn hefði drukknað og aðstandendur hans krafið íslenska ríkið um bætur þar sem engar leiðbeiningar eru um leiðir þarna inneftir hafi ferðamenn ekki borið sig eftir þeim áður en anað er af stað? Auðvitað á hver að bera ábyrgð á sínu eigin lífi og vera skynsamur að taka minnstu áhættu þegar náttúruöflin eru annars vegar. Það á að vera alveg ljóst að nauðsynlegt er að bæta upplýsingar og að það sé augljóst að ef ferðafólk hyggst fara á þessar varhugaverðu slóðir geri það á eigin ábyrgð og sé tilbúið að greiða fyrir aðstoð ef á það reynir. Það er rándýrt að reka björgunarsveitir hvað þá þyrluþjónustu. Þjóðfélagið getur ekki boðið hana endalaust ókeypis.

Ekki er ólíklegt að á þetta kunni að reyna einhvern tíma í náinni framtíð. Hvarvetna er varað við nánast öllum hættum á vinsælum ferðamannastöðum erlendis. Lögreglan á að setja upp upplýsingaskilti á áberandi stöðum að vara við þeirri hættu sem ókunnugum er ekki ljós. Slíkt myndi bæta réttarstöðu okkar. Svona tilvik er mjög hliðstætt við Icesave málið: á að láta þjóð bera ábyrgð á glannaskap og léttúð einstaklinga?

Mosi


mbl.is Hrakinn ferðamaður í Húsadal
Tilkynna um óviðeigandi tengingu við frétt

Minnisstæður kennari

Fyrstu starfsár Menntaskólans við Hamrahlíð eru minnisstæð. Afburða kennarar á öllum sviðum kenndu þar og áttu sinn þátt að móta nemendur sína sem margir hverjir eru í dag þjóðþekktir einstaklingar. Einn þesara góðu og velmenntuðu kennara var Jón Böðvarsson cand. mag. Hann kenndi ekki aðeins íslensku og lauk upp leyndardómum Íslendingasagna á sinn eftirminnilega hátt, heldur var lærifaðir margra í íslenskri bókmenntasögu. Jón var einn af stjórnendum skólans og minnistætt er mér þegar hann tók að sér það krefjandi verkefni að aga nemendur MH á sinn einstaka hátt. Það var nefnilega svo að fyrstu árin í MH var bekkjarkerfi eins og tíðkaðist lengi vel. Skólinn var byggður í nokkrum áföngum eftir efnum og sitthvað sem þurfti að leggja áherslu á. Margir nemenda voru nokkuð óstýrilátir enda allur skólabragur öðruvísi og frjálslegri en í gamla Menntaskólanum í Reykjavík. Á þeim bæ hafði lítt breyst frá miðri 19. öld, helst að tekin hafði verið upp rafmagnslýsing og lögð heitt vatn í það gamla hús. Í MH voru þéringar á hröðu undanhaldi, nemendur voru gjarnan í lopapeysum og klæddu sig í klassískar úlpur frá Álafossi sem þótti nokkuð „sveitó“ að áliti MR-inga sem margir hverjir voru í jakkafötum, hvítum skyrtum og tilheyrandi hálstau og þéruðu enn hástemmt kennara sína.

Árin fyrir og um 1970 í MH var aðalinngangur skólans að suðvestanverðu, næst Háuhlíðarbrekkunni. Var þá gengið inn í kjallara byggingarinnar og í allstórt rými þar sem hverjum nemenda var ætlaður sinn snagi fyrir úlpur og yfirhafnir auk skópláss. Þar þurfti að skipta um skó, draga af sér misjafnlega foruga útiskó og fara í inniskó. Þetta var í raun mjög praktískt enda dregið stórlega úr kostnaði við ræstingu skólans. Þá var gengið áfram inn dimman kjallaragang í byggingunni og upp tröppur á aðalhæð skólabyggingarinnar. Í byrjun hvers dags eftir að fyrsti tími dagsins hófst, tók Jón Böðvarsson sér stöðu þar á stigapallinum. Hafði hann stól, borð, síma og símaskrá yfir alla nemendur skólans. Kerfi umsjónarmanna gekk út á það að ef einhvern nemenda vantaði án þess að það hafði verið tilkynnt sérstaklega, átti hver umsjónarmaður að hraða sér eftir nafnakall og tilkynna Jóni um fjarvistir. Hringdi hann umsvifalaust heim til allra þeirra sem annað hvort höfðu sofið yfir sig eða hugðust skrópa þann daginn. Einu sinni lenti eg í því að sofa yfir mig og man vel hve rödd Jóns var ákveðin en samt mjög kurteys og hann sýndi einstaka lipurð við þennan starfa. Það þótti alltaf dálítið vandræðalegt að lenda í þessu en að öllum líkindum var aðhald þetta öllum bæði hollt og hefur ekki skaðað neinn. Nauðsynlegur agi er öllum nauðsynlegur en það þarf að beita þessu meðali með mikilli hófsemi og nærgætni.

Jón var einstakur kennari í Njáls sögu. Hann ýmist las stutta kafla og beitti oft fyrir sig góðum leikhæfileikum að túlka hverja persónu, eða hann endursagði með sínu orðavali það sem máli skipti í söguþræðinum eða mikilsverð mál sem sagan spannst um. Oft voru það mikilsverðir og eftirtektarverðir vendipunktar sem höfðu áhrif á framhaldið. Hann lagði sig mikið fram að opna þennan heim forsagna sem best ungum nemendum og veitti góða innsýn inn í þessa veröld íslenskrar sagnalistar.

Síðast átti eg samskipti við Jón fyrir nokkrum árum á Eyrbyggjunámskeiði sem hann hélt fyrir troðfullu húsi í Kennaraháskólanum.

Við eigum góða minningu um eftirminnilegan læriföður.

Mosi

 

 


mbl.is Jón Böðvarsson er látinn
Tilkynna um óviðeigandi tengingu við frétt

Utanvegaakstur

Á myndinni má sjá óteljandi slóðir eftir jeppa sem strangt til tekið heyrir undir „utanvegaakstur“. Slíkt atferli varðar við lög um náttúruvernd. Yfirvöld hafa sýnt mikið umburðarlyndi varðandi þetta eldgos en sjálfsagt er að huga að þessu fordæmi sem þetta kann að verða til enn verri brota af þessu tagi.

Spurning er hvort ekki hefði þurft að hafa betri stjórnun á þessu. Kannski hefði mátt setja n.k. „ítölu“ en með því er átt að sett er takmörkun á hversu margt búfé megi setja í beitarhólf og jafnvel heilan afrétt.

Líklegt er að jeppamenn fari allir sömu slóð upp frá Skógum og langleiðina að gosstöðvunum. Vonandi sér vindurinn og ytri öflin að afmá slóðirnar á hálsinum sjálfum sem fyrst þegar gosinu linnir.

Þetta gos má EKKI verða jeppafólki hvatnig til utanvegaaksturs þó eftirlit sé lítið og jafnvel ekkert! Lög um náttúruvernd gilda hvarvetna í íslenskri náttúru og skiptir auðvitað engu hvort um einhver náttúrufyrirbrigði komi þar við sögu.

Mosi


mbl.is Virknin í eldgosinu óbreytt
Tilkynna um óviðeigandi tengingu við frétt

Afdrif Wallenbergs

Stríð eru hræðileg fyrir venjulegt fólk. Þeim fylgja mannréttindindabrot oft af grófasta tagi og þaðan af verra. Heilu þjóðirnar verða að blæða.

Sænski stjórnarerindrekinn Wallenberg hvarf við skyldustörf sín seint í heimsstyrjöldinni. Hann tengdist björgun Gyðinga frá grimmilegum örlögum sem og annarra. Síðast fréttist af honum þar sem hann er í haldi hjá Rauða hernum og leyniþjónustu Stalíns KGB. Hann hverfur að því virðist sporlaust í höndum á þessum viðsjárverðu stjórnmálaöflum og sagður hafa látist úr hjartabilun ní svartholi KGB.

Nú hafa sagnfræðingar komist á slóðina og dregið fram skjöl sem upplýsa örlög Wallenbergs. Vonandi verður unnt að fá fullnægjandi upplýsingar um hvað gerðist hinstu daga í lífi þessa mannvinar sem sagður er hafa fengið aðvaranir um hvað að höndum gat borið og varð að raunveruleika síðast daginn sem hann var frjáls maður.

Mosi


mbl.is Ný gögn um Wallenberg
Tilkynna um óviðeigandi tengingu við frétt

« Fyrri síða

Um bloggið

Siðvæðing í stjórnmálum

Höfundur

Guðjón Sigþór Jensson
Guðjón Sigþór Jensson

BA í bókasafns- og upplýsingafræði frá Félagsvísindadeild HÍ. Próf frá Leiðsöguskóla Íslands 1992.  Áhugamaður um félagsmál, sagnfræði, orkumál, náttúrufræði og umhverfismál. Átti þátt í að stofna Umhverfis- og náttúrufræðifélags Mosfellsbæjar  (stofnað 2007) og var fyrsti formaður til nóv. 2010.

Hef búið í Mosfellsbæ síðan í janúar 1983.

Bloggvinir

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • IMG_1616
  • Frá Svörtu gljúfrum Gunnison þjóðgarði
  • Bútur af járnbrautarteinum?
  • ...259_1074252
  • ...259_1074251

Heimsóknir

Flettingar

  • Í dag (28.3.): 1
  • Sl. sólarhring: 6
  • Sl. viku: 15
  • Frá upphafi: 242836

Annað

  • Innlit í dag: 1
  • Innlit sl. viku: 15
  • Gestir í dag: 1
  • IP-tölur í dag: 1

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband