Handtaka og farbann

Af hverju eru þessir herramenn ekki handteknir og settir í farbann?

Gríðarlegir hagsmunir hafa verið í höndunum á þessum bankastjórum sem margir hverjir hafa sýnt af sér ótrúlegt gáleysi á undanförnum misserum. Þessir menn hafa verið á ofurlaunum sem eru okkur venjulegu fólki gjörsamlega óskiljanlegt.

Eftir handtöku væri rétt að fram færi yfirheyrsla yfir þeim þar sem þeir væru látnir gera grein fyrir fjármálaumsvifum sínum undanfarna mánuði. Þá kann farbann að vera nauðsynlegt til þess að gæta rannsóknarhagsmuna og að koma í veg fyrir að þeir yfirgefa landið og hugsanlega koma eignum undan.

Þeir sem hafa verið í yfirstjórn gjaldþrota banka geta átt yfir sér réttarstöðu grunaðs manns um refsiverð athæfi sem tengjast efnahagsbrotum og refsilögum. Það væri því rétt að fá sem fyrst einhverjar haldbærar upplýsingar frá fyrstu hendi hvar verðmæti eru sem þessir menn gætu hugsanlega dregið sér og þar með grafið undan almanna hagmunum.

Einhvers staðar þarf að byrja og ef það eru ekki bankastjórarnir sem bera einhverja ábyrgð á röngum og umdeildum ákvörðunum sem skaðað hefur okkur öll, hver þá?

Mosi

Hreiðar Már yfirgefur Kaupþing

Athugasemdir

[Jón Gunnarsson (IP-tala skráð) 23.10.2008 kl. 00:15]

Það er orðið of seint núna. Þeir eru farnir úr landi.

[Guðjón Sigþór Jensson, 23.10.2008 kl. 11:35]

Gætu þeir ekki skotið upp kollinum hér aftur? Nauðsynlegt er að yfirvöld fái sem ítarlegastar upplýsingar um eignir sem hefur væntanlega verið skotið undan. Þeir sem grunaðir eru um græsku verða að gera skil á skatti og skuldum.

Mosi