Gull og grænir skógar

Óhætt má taka undir með skáldinu Einari Benediktssyni þegar hann orkti í Herdísarvík 1934: Gengi er valt, þá fé er falt
fagna skalt í hljóði.

Þá var svo komið hjá skáldinu að allar skýjaborgirnar voru hrundar, öll áform hans um gull og græna skóga runnin út í sandinn. Örbirgð mikil og auð misskipt.

Vaxandi og stígandi lukka er best en ekki skyndigróði þá allt er falt.

Þegar hlutabréfin falla, leitar markaðurinn uppi að lokum það raunverulega verð sem þau eru virt. Kannski þegar framboð er meira en eftirspurn getur eðlilega orðið til góð kauptækifæri. Nú er t.d. svo komið að Spron er núna komin í um 35% hæsta markaðsverð sem var fyrir um hálfu ári síðan. Og Exista hefur einnig fallið um nálægt sama hlutfall. Kaupþing fallið um 40% en aðrir bankar e-ð minna.

Spurning er hvernig uppgjör ársins 2007 verður hjá fyrirtækjunum. Flest bendir til að reksturinn sé í blóma en álitamál hvernig framhaldið verður.

Mosi 

Fjárfestar milli vonar og ótta

Skrár tengdar þessari bloggfærslu:

• Greinar

Athugasemdir

[Sigurður Hreiðar, 22.1.2008 kl. 23:34]

Kannski á við brot út kvæði að mig minnir eftir Jón próf. Helgason:

Að geyma gull er valt / ég gæti misst það allt / til eignar einum þiofe / með angur þúsundfalt…

[María Kristjánsdóttir, 22.1.2008 kl. 23:56]

Ég verð nú að bæta við einni vísu sem mamma kenndi mér um gullið þó það sé reyndar hliðartenging:

það er dauði og djöfuls nauð

er dyggðasnauðir fantar

safna auð með augun rauð

er aðra brauðið vantar.

[Guðjón Sigþór Jensson, 23.1.2008 kl. 08:59]

Þessi vísa sem Sigurður nefnir þekkir Mosi ekki.

Vísan sem María nefnir er sögð hafa verið orkt af Sigurði Breiðfjörð. Tilefnið var að Sigurður biður Stefán bróður sinn Eiríksson um peningalán. Hann sem synjaði og þá varð Sigurði þessi vísa. Stefán kvað á móti:

Þótt Breiðfjörð mikið berist í/ og biðji kvenna í hrönnum./ Undir mígur seggur sá/ samt hjá tignarmönnum.

Af Stefáni bróður Sigurðar fer fáum sögum enda hefur hann fallið í skuggann af bróður sínum. En greinilegt er af vísu þessari að hann hefur einnig verið skáld gott.

Heimild Mosa er: http://skjalasafn.skagafjordur.is/lausavisur/visur.php?VID=13164

Á þessari heimasíðu er mikill sægur lausavísna sem gott er að vita af.

Mosi