Ferðamannaiðnaður: hvaða fyrirbæri er það?

Orðskrípi á borð við „ferðamannaiðnaður“ hafa vaðið uppi og ekkert gengur að kveða þennan  draug niður fremur en aðra drauga. Hvað mætti ætla að væri átt við orðinu „ferðamannaiðnaður“? Er það einhver iðnframleiðsla eins og minjagripaframleiðsla í þágu ferðamanna? Sennilega „Made in China“?

Eða pulsugerð til að seðja sárasta hungur ferðamanna í sjoppum og söluskálum landsins?

Það er undarlegt ef rétt er eftir Grími Sæmundsen forstjóra Bláa lónsins haft að hann nefni einn mikilvægasta atvinnuveg þjóðarinnar þessu orðskrípi. Fyrir löngu hefur verið bent á að þetta hugtak er með öllu óhæft og er bein þýðing á enskunni „tourist industry“ en þar er fremur átt við starfsemi eða öllu heldur þjónustu fremur en iðnað. Enskan er allflókið tungumál og margir varast illa blindgötur þegar verið er að þýða orð.

Fyrir meira en 20 árum sótti eg tíma hjá Birnu Bjarnleifsdóttur sem veitti Leiðsöguskóla Íslands forstöðu. Lagði hún mikla áherslu á að við ættum að nefna hlutina réttu nafni og þessi stöðugt vaxandi atvinnugrein þyrfti að vaxa og dafna undir sínu rétta nafni: FERÐAÞJÓNUSTA!

 

Undirverðlagðar ferðamannaperlur

Athugasemdir

[Ufsi (IP-tala skráð) 2.11.2013 kl. 19:28]

"..segir Grímur Sæmundsen, forstjóri Bláa Lónsins." En Bláa Lónið er manngerður sundstaður úr iðnaðarúrgangi. E.t.v þýðir "ferðamannaiðnaður" að við eigum að halda áfram að búa til "náttúruperlur" fyrir ferðamennina. Enda virðast þær manngerðu vinsælli en þær náttúrulegu.

[Guðjón Sigþór Jensson, 3.11.2013 kl. 12:57]

Mér finnst þetta vera á jaðrinum að vera útúrsnúningar.