Upp með plóginn!

Vorstörfin eru nauðsynleg. Við á Íslandi getum margt meira en forfeður okkar. Við búum í erfiðu landi þar sem veður geta orðið válynd og valdið nokkrum usla. Við verðum því að nýta sem best þá möguleika sem gera okkur störf okkar, atvinnu, samgöngur og eiginlega allt sem snertir daglegt líf okkar auðveldara.

Klemens á Sámstöðum kannaði hvernig skjólskógar gætu komið að gagni við kornrækt. Niðurstöður hans voru að búast mætti með fjórðungs jafnvel þriðjungs betri árangurs í kornrækt með skjólskógi en ella væri! Þar er munurinn bæði hvað varðar kornþunga sem þroska kornsins varðar, skjól skógar hefur afgerandi áhrif!

Við eigum að rækta sem mest af skógum bæði til skjóls vegna ræktunar sem og til bættra samgangna. Beitiskógar hafa vaxandi nytjar bænda af búsmala, unnt er að hafa ær, kýr, hesta sem og önnur húsdýr þar sem vaxandi beitiskógar eru.

Þá m´ekki gleyma hreinum nytjaskógum sem gætu staðið undir allri okkar þörf fyrir timbri og jafnframt verið undirstaða mikilvægs atvinnulífs. Í dag eru um 40 ársverk í skógarhöggi og grysjun, um 10% starfa í álbræðslu! Við gætum fjölgað mjög mikið þessum störfum á næstu árum!

Og útivistarskógar og yndisskógar eru nú þegar margir sem hafa dregið til sín hundruði þúsunda meðal  okkar sem teljum það vera eitt mesta útivistarævintýri að ganga þar um og njóta útiveru. Fjölbreytt fuglafána sem þar er dregur ekki úr ánægju okkar.

Þeir sem ekki trúa ættu að leggja leið sína í Heiðmörk, Rauðavatnsskóg, Öskjuhlíð, Elliðaárdal, Hvaleyrarvatn sunnan Hafnarfjarðar eða Guðmundarlund í Kópavogi, Kjarnaskóg við Akureyri og öll þau mikilvægu sívaxandi skógræktarsvæði um allt land.

Góðar stundir!

Jarðvegurinn undirbúinn á páskum

Athugasemdir

[Anna Sigríður Guðmundsdóttir, 9.4.2012 kl. 09:22]

Vonandi verður vökvunar-vor og sólskins-sumar, svo vel takist að rækta það sem gott er.

M.b.kv.

[Guðjón Sigþór Jensson, 9.4.2012 kl. 10:26]

Gott er að hafa náttúrulega vökvun öðru hvoru. Þó svo að sé fremur þurrt þá dugar oft næturdöggin mörgum jurtum að þrauka. Sumar trjátegundir eru með djúpar rætur þannig að langvarandi þurrkar gera þeim lítið mein. En það er ungviðið og viðkvæmar plöntur sem mega ekki vera án vökvunar. Þá er það vindurinn. Gott er að mynda skjól. Þannig væri unnt að nýta eitthvað af þeim þúsundum vörubretta sem til falla á hverju ári til að mynda skjól fyrir nýjum skjólbeltum. Vörubrettin eru auðvitað enginn fegurðarauki en mjög góð til að flýta fyrir vexti og þroska.