Má treysta því að forseti fari?

Ólafur Ragnar á endilega að þiggja boð Al Gore að fara til Suðurskautsins sem virðist verða stöðugt vinsælla með hverri vikunni sem líður. Fyrir nokkru fréttist af að fyrrum bankaræningjar frá Íslandi hefðu verið þar sem og einhverjir útrásarvargar þannig að vinsældir Suðurskautsins fara sívaxandi.

Við sem viljum gjarnan sjá forseta sem grípur ekki stöðugt fram fyrir hendurnar á framkvæmdavaldinu og löggjafarvaldinu ættum að fagna ferð forseta. Og munum sennilega ekki sakna hans tilfinnanlega á meðan hann er fjarri, rétt eins og Marínó Hafstein fyrrum sýslumaður í Strandasýslu sem var mjög ánægður þegar Klemens Jónsson landritari var 3 eða 4 mánuði fjarri í Stjórnarráðinu á sínum tíma.

En auðvitað óskum við Ólafi góðrar ferðar og vonum að hún muni koma til með að verða eins ódýr og hagkvæm enda veitir ekki af að halda vel um öll óþarfa útgjöld enda mun málatilbúnaðurinn vegna Icesave kosta offjár.

Annars mætti benda þeim Al Gore og Ólafi Ragnari á að unnt er að fara um jökulbreiður á Íslandi á hagkvæmari hátt en alla leið á Suðurskautið og spara þar með offjár á kostnað skattborgara. Það þarf ekki að auka ferðaálag á Suðurskautið til að vekja athygli á góðum málstað.

Ólafur Ragnar og Al Gore til Suðurskautslandsins

Athugasemdir

[Geir Ágústsson, 30.1.2012 kl. 12:41]

En að hugsa sér hvað Icesave hefði kostað ef það hefði komist í gegnum löggjafann og fengið undirskrift forsetans. Hvað voru þeir nú aftur margir tugmilljarðarnir sem hefðu fallið á íslenska skattgreiðendur í ár vegna "vaxta"? Ríkið gæti haldið úti teymi færstu lögfræðinga í áratugi fyrir minna fé.

[Guðjón Sigþór Jensson, 30.1.2012 kl. 18:04]

Geir:

Icesave hefði ekki kostað okkur skattgreiðendur eina einustu krónu ef braskaranir í bankanum hefðu verið stoppaðir af í tíma! En þáverandi stjórnvöld, nafni þinn í Stjórnarráðinu, Davíð í Seðlabankanaum, Jónas í Fjármálaeftirlitinu og fleiri ekki verið steinsofandi í störfum sínum.