Stöndum saman gegn þessari ógn

Vitað er og sannað að mótorhjólaklúbbar á borð við Banditos og Hells Angels hafa beitt sér fyrir ólöglegri starfsemi í nágrannalöndunum þ.á m. eiturlyfjasölu, vændi, mansali og handrukkunum ásamt ýmsu ofbeldi öðru, jafnvel alvarlegum líkamsárásum og manndrápum. Hafa lögregluyfirvöld í nokkrum löndum hreinlega hvatt íslenska starfsfélaga að vera á varðbergi gagnvart þessari starfsemi og gera allt til að koma í veg fyrir að þessi starfsemi festi rætur hérlendis. Ógnvænleg framkoma nokkurra þessarra aðila sem skreyta sig torráðum táknum þessarra umdeildu alþjóðlegu samtaka bendir einnig til að þeir séu til alls vísir og grunnt kann að vera á ofbeldinu. Má þar nefna er einn af forsprökkum þessara gengja gengu í skrokk á blaðamönnum fyrir nokkrum misserum vegna þess að viðkomandi líkaði ekki skrif þeirra um sig í fjölmiðlum. Hvað er þetta annað en ógn gegn almannahagsmunum? Á að gefa eftir og leyfa þessum aðilum að taka „lögin“ í sínar hendur eins og þeir vilja skilgreina þau?

Ekki er verið að amast út í félagsskapinn sem slíkan eins og sumum finnst vera. Öllum er frjálst að stofna félag „í sérhverjum löglegum tilgangi“. En um leið og verkefni félagsins felast í verknaði sem brýtur gegn landslögum og allsherjarreglu, lýðræðinu og jafnvel sjálfsákvörðunarrétti okkar sem þjóðar, þá er heimilt að uppræta slíkt félag og banna.

Mosi

Heimilt að banna Vítisenglana

Athugasemdir

[Kristján Hilmarsson, 31.3.2010 kl. 18:33]

Það getur verið að enn og einu sinni túlki Íslensk stjórvöld stjórnarskrána og framkvæmi þar eftir, en mér vitanlega er hvergi, hvorki í Evrópu né USA bann við þessum eða öðrum álíka klúbbum, hitt er svo annað mál að bæði innbyrðis átök milli klúbbanna og að þeir séu oftar en ekki tengdir ýmsri glæpastarfsemi er samfélagsvandamál, svo þar sem þeir hafa fest rætur hefur lögreglan jafnan þurft að hafa afskifti af þeim, svo til að undirbúa lögregluna undir það að þeir festi rætur á íslandi, væri gott ráð að byrja nú að vinna meir með þjóðum sem hafa reynsluna, heldur en sí og æ að reyna finna upp hjólið sjálf.

Vitum hvernig það fór t.d.þegar bankafrelsið var gefið á "Íslenska" vísu.

[Guðjón Sigþór Jensson, 3.4.2010 kl. 12:30]

Auðvitað er ekki löglegt að stofna félag með ólögleg markmið. Þannig gæti félag sem hefði lögbrot á stefnuskrá sinni ekki notið félagafrelsis stjórnarskrárinnar. Í henni segir berum orðum að frjálst sé að stofna félag í sérhverjum löglegum tilgangi. Ef stofnað væri t.d. þjófafélag eða ofbeldisfélag þá nyti það félag ekki verndar stjórnarskrárinnar.

Mosi