Stofnum fyrirtæki um hreindýramosann

Eigum við að stofna fyrirtæki?

Á ferðum mínum um landið sem leiðsögumaður er eg iðulega spurður um hreindýramosann sem þýskir nefna Islandsmos.

Þeir þýsku horfa agndofa á hreindýramosann með undrun að ekki skuli hann nytjaður sem annar jarðar gróður.

Það er ábyggilega grundvöllur að reka fyrirtæki t.d. á Austfjörðum við að tína fjallagrös þ. á m. hreindýramosa. Þá þarf að hreinsa, meðhöndla, vinna og pakka varninginn með útflutning og sölu til ferðamanna í huga. Hreindýramosinn nýtist til margs kyns skreytinga t.d. í þýsku jólajötuna, Krippe eins og þeir þýsku segja og finnst vera ómissandi á öllum kristnum heimilum þýskum. Auk þess er vinsælt að hafa Ísalandsmosa á leiði ættingja og hann þykir ómissandi sem ígildi trjágróðurs við gerð umhverfis leikfangalesta (Modelbahn). Í lyfjaframleiðslu er hreindýramosi einnig mjög mikilvægur enda ýms eftirsótt virk efni í honum. Þá er unnt að útbúa te og aðra heilsudrykki úr hreindýramosa og öðrum fjallagrösum.

Hugmynd væri að selja ferðafólki te með hreindýramosa sem og hæfilega stórar neytendapakkningar á Seyðisfirði á fimmtudagsmorgnum þegar beðið er eftir að aka um borð í Norrænu.

Kostnaður við að koma þessu fyrirtæki á koppinn gæti varla verið meira en útgerð trillubáts.

Við gætum orðið rík á þessu og vaðið í peningum eins og útrásarvíkingarnir forðum. Kannski að fyrirtæki sem þetta myndi skila umtalsvert meiri arðsemi en til samans álverið á Reyðarfirði og Kárahnjúkavirkjun sem kostuðu okkur gríðarlegar náttúrufórnir á Austurlandi og kollvörpuðu íslenskum efnahag með hruni bankakerfisins.

Mosi

Athugasemdir

[Símon Ólason, 22.9.2009 kl. 20:24]

Sæll og blessaður Mosi góður og gamli skólabróðir.

Þessi hugmynd þín er gulls í gildi. Ég hef áhuga á að leggja henni lið eftir mætti, ef mér gefst kostur á.

Kveðja og þakk fyrir skemmtilegt og áhugavert blogg.

Símon Ólason

Netfang: [e-mail]

[Guðjón Sigþór Jensson, 23.9.2009 kl. 07:35]

Þakka þér Símon. Sendi þér einnig línu á veffangið þitt.

Er hvorki sjálfur með reynslu af stofnun og rekstur fyrirtækis né annarrar forréttingar og læt því öðrum að koma þessari hugmynd á flot. En auðvitað væri gaman að vera með í rekstri lítils en arðvæns fyrirtækis.

Mosi