Þurfum við fleiri hagfræðinga?

Þegar eg nam þýsku í menntaskóla fyrir 40 árum þá var meðal ágætis lesefnis smáfrásagnir, sumt með nokkuð köldum húmor.

Ein sagan gekk út á það að gamall maður fór milli margra lækna til að leita bóta á vanheilsu sinni. Ekki tókst neinum lækni að finna það sem amaði að þeim gamla en svo fór að lokum að elli kerling tók hann og hann dó.

Heimilislæknirinn ritaði í reitinn þar sem fyrirsögnin var Dánarorsök: Of margir læknar.

Ekki fór neinum sögum um hvort læknirinn hafi fengið tiltal vegna þessa.

Það grafalvarlega ástand sem nú einkennir íslenskt samfélag er ekki vegna þess að of fáir hagfræðingar séu á þingi. Við getum alveg eins fengið nokkra veðurfræðinga kjörna sem þingmenn, þeir breyta engu hvort betri veðurhorfur verði hér á landi næstu árin.

Hagfræðingar eru sérfræðingar í „hinum döpru vísindum“. Þeir njóta sín best þegar þeir gegna stöðum sérfræðinga í samfélaginu þar sem þeir sinna vísindalegu köllun sinni á sem hlutlausastan hátt. Við þurfum ekki pólitíska hagfræðinga fremur en pólitíska veðurfræðinga.

Kannski að kollsteypan í efnahagslífi þjóðarinnar sé vegna þess að of margir hagfræðingar vildu stýra þjóðarskútunni og tókst ekki betur en raunin er.

Mosi

Tryggvi Þór Herbertsson vill á þing

Athugasemdir

[Páll Jónsson, 19.2.2009 kl. 17:32]

Ef valið stendur á milli hagfræðinga annars vegar og árulesara hins vegar þá vel ég nú frekar hagfræðinga.

[Guðjón Sigþór Jensson, 19.2.2009 kl. 17:51]

Hvað er árulesari? Hef aldrei heyrt þetta orð. Er það e-ð fúsk eða gervivísindi?

Mosi

[Páll Jónsson, 20.2.2009 kl. 12:22]

Árulesari skoðar víst "árur" hjá fólki. Frjálslynda flokknum fannst sniðugt að skella einum slíkum á þing. Svo er hún teiknimiðill líka, jibbí!

Það eru svona hlutir sem fá mann til að velta fyrir sér kostum og göllum þess að henda sér fyrir vörubíl.