Ævisaga Snorra Sturlusonar

Snorri Sturluson er eitt af okkar allra stærstu nöfnum. Hann elst upp við bestu aðstæður á Íslandi hvað menntun snertir. Hann verður einn af mikilvægustu stjórnmálamönnum og valdsmönnum landsins sem þá eins og oft síðar: valdið hefur þá náttúru að vera varhugavert og vandasamt með það að fara. Umdeildar ákvarðanir leiddu til að fyrrum tengdasynir hans koma saman, Gissur Þorvaldsson, Kolbeinn ungi og Árni óreiða, bóndi Í Brautarholti á Kjalarnesi. Þeir fara að Snorra í Reykholti þar sem sá Árni vinnur á fyrrum tengdaföður sínum að áeggjan hinna tveggja.

En Snorri hefur með ritum sínum reist sér einhvern stærsta bautastein sem gnæfir yfir hjá bókaþjóðinni.

Margir hafa ritað um Snorra. Má þar nefna Sigurð Nordal og Gunnar Benediktsson kennara, rithöfund og áður sóknarprest til Saurbæjarsóknar í Eyjafirði. Gunnar ritaði einar 4 bækur um Sturlungaöldina þar sem víða var vikið að Snorra: Ísland hefur jarl, Snorri skáld í Reykholti, Skyggnst umhverfis Snorra og Sagnameistarinn Sturla. Reyndar voru bækurnar 5 þegar stærsta ritið er talið með: Rýnt í fornar rúnir en það spannaði einnig 12. öldina í sögu Íslendinga.

Ævisaga Snorra Sturlusonar verður ábyggilega ein af helstu bókunum meðal ævisagna sem mest verða lesnar næstu misserin. Ævi Snorra var stormasöm að ekki væri meira sagt. Hún er lærdómsrík fyrir margra hluta sakir og undirritaður hlakkar til þeirrar stundar þá þessi bók ratar í fórur mínar. Það verður fróðlegt að skoða efnistök og frásagnartækni höfundar.

Mosi

Ævisaga Snorra Sturlusonar komin út

Athugasemdir

[Þorvaldur (IP-tala skráð) 29.10.2009 kl. 18:56]

Alveg er ég viss um að hvorki Óskar né Snorri hefðu komist svona að orði: „Óskar Guðmundsson hefur verið búsettur á sama stað og Snorri Sturluson lifði...“ Lítið fer Netmogganum fram í málfarsefnum.

[Haukur (IP-tala skráð) 29.10.2009 kl. 22:20]

Kannski betra væri að segja þar sem Snorri Sturluson dó, enda bjó Snorri víða á sinni ævi, en dó bara á einum stað. Hins vegar er vert að það komi fram að Árni óreiða var ekki að drápi Snorra, þar var hins vegar nafni hans beiskur.