Harmagrátur Sjálfstæðisflokksins

Þvílík ræða Sigurðar Kára Kristjánssonar. Ætla mætti að vondar tungur séu að ljúga upp á Sjálfstæðisflokkinn að hann hefði verið í ríkisstjórn síðastliðin tæp 18 ár. Auðvitað var gerð röð af mistökum sem Sjálfstæðisflokkurinn getur ekki hlaupist undan.

Sigurður Kári ætti að finna sér e-ð annað verðugara að dunda sér við en að verja gjörsamlega vonlausan málstað. Að fárast út í einhverjar skattahækkanir það er vægast sagt broslegt að ekki sé meira sagt. Auðvitað verður ekkert hróflað við sköttum á þessu ári enda mælir flest á móti því að skattar séu hækkaðir án fyrirvara. Nú er árið byrjað og ekki gott að leggja aukna skatta og láta gilda afturfyrir. Þetta gerði þó Sjálfstæðisflokkurinn fyrr á tímum og fór létt með það.

Mig langar til að benda á, að þeir sem eru loðnir vel um lófana, sannkallaðair ríkisbubbar, fyrir þeim eru auknar skattgreiðslur mun léttari en auknar skattálögur barnafólks og fátæku ekkjunnar. Mættu þeir taka Einar Benediktsson til fyrirmyndar í fleiru en raka saman ofsagróða.

Einhverju sinni var lagt útsvar sem oftast á Einar. Þótti honum upphæðin mjög lág og kærði álagninguna - til hækkunar, enda þótti honum skattfjárhæðin vera svo kotungsleg að sér sæmdi ekki að vera þekktur fyrir að greiða „vinnukonuútsvar“.

Við eigum að vera stolt af því að geta tekið þátt í rekstri þjóðfélagsins. Viðeigum hins vegar kröfu á að halda uppi þeirri þjóðfélagsþjónustu sem við þurfum á að halda. Þess vegna eigum við að halda uppi skólunum, heilbrigðiskerfinu og öðru því sem er okkur mikilvægast.

Hins vegar má gjarnan strika út - og það sem fyrst - öllum óþarfa rándýra útgjaldaliði eins og allt sem tengist her og vitaóþarfa slíku prjáli.

Mosi

 

Þýðir ekki að klína sök á Sjálfstæðisflokkinn