Sigmundur Davíð: Hvernig væri að leggja fram ársreikning Framsóknarflokksins vegna 2009?

Sigmundur Davíð hefir verið iðinn við að gagnrýna ríkisstjórnina sem og aðra af minnsta tilefni. Svo virðist sem Framsóknarflokkurinn beiti fyrir sig þessum manni til að draga athyglina frá öðrum mikilvægari hlutum.

Hvaða skyldur þarf stjórnmálaflokkur að framfylgja í nútímasamfélagi?

Eitt af því er að gera opinberlega grein fyrir uppruna og notum þess fjár sem stjórnmálaflokkurinn hefir í áranna rás haft til ráðstöfunar. Lengi þurftu stjórnmálaflokkar ekki að standa reikningsskap gerða sinna en nú eru breyttir tímar.

Framsóknarflokkurinn dró lengi lappirnar að sætta sig við þessar skyldur og svo virðist sem sitt hvað sé gruggugt í þeirra ranni. Meðan  engin áhersla er lögð á að gera opinberlega grein fyrir fjármálum sínum er formaður þessarar flokksnefnu á fullu að gagnrýna allt milli himins og jarðar rétt eins og hann sé hafinn yfir alla gagnrýni.

Sigmundur Davíð sver sig í flokk þessara dæmigerðu lýðskrumara sem telja allt vera tortryggilegt nema hjá þeim sjálfum. Og á meðan virðist allt vera óhreint eða óuppgert í þeirra eigin ranni.

„Sá yðar sem saklaus er, kasti fyrsta steininum“ sagði Kristur þá grýta átti hina bersyndugu konu til bana. Öllum féllst hendur enda vissu þeir upp á sig skömmina.

Mætti Sigmundur Davíð eitthvað af þessu læra!

Sjálfsagt mætti innleiða þá reglu hér á landi, að ef stjórnmálaflokkur sinni ekki lagaskyldu sinni vegna upplýsingingarskyldu sinni vegna fjármála sinna innan tímamarka, verði þegar að gera ráðstafanir að hann verði jafnvel bannaður og leystur upp!

Mosi

Gæti beitt sér í Icesave-deilunni

Athugasemdir

[Guðrún María Óskarsdóttir., 27.2.2011 kl. 23:48]

Sæll vertu.

Ertu viss um að þú fylgist nógu vel með ?

kv.Guðrún María.

[Guðjón Sigþór Jensson, 28.2.2011 kl. 00:18]

Hvaða athugasemdir hefir þú Guðrún?

Framsóknarflokkurinn var lengi vel inni á því að fjármál flokkanna ætti að gera opinber. Það átti að vera eins og prívatmál þeirra sem engum kæmi við. Mútur, háar fégreiðslur frá aðilum sem flokkurinn sýndi sérstakan skilning á... Er þetta ekki spilling rétt eins og þegar verið var að fjármagna starf umdeildra stjórnmálaflokka á síðustu öld og leiddi til skelfingar, jafnvel fyrir allt mannkynið?

Við verðum að koma í veg fyrir spillingu eins og hægt er.

Mosi

[Gunnar Heiðarsson, 28.2.2011 kl. 00:25]

Hvað kemur ársreikningur Framsóknarflokksins fyrir árið 2009 icesave við?

[Vendetta, 28.2.2011 kl. 00:33]

Já, Guðjón, Framsóknarflokkurinn var æði djúpt sokkinn í spillinguna á sínum tíma, meðan hann var undir gömlu forystunum: Jónasi frá Hriflu, Hermanni Jónassyni, Eysteini Jónssyni, Ólafi Jóhannessyni, Steingrími Hermannssyni, Halldóri Ásgrímssyni, Jóni Sigurðssyni, Guðna Ágústssyni og Valgerði Sverrisdóttur. En etv. er Framsókn á batavegi, því að Sigmundur Davíð er einn af fáum þingmönnum sem talar af viti. Kannski er hann bara í röngum flokki? Kannski ætti hann að vera fjórði maður í Hreyfingunni?

Eitt er víst, að þótt Sigmundur hafi meira pólítískt vit en allir ráðherrar í ríkisstjórninni samanlagt, þá verður það gífurlega erfitt fyrir hann einan mann að draga flokkinn upp úr forarpytti fortíðarinnar. Annars ber að geta þess, að Framsóknarflokkurinn kallar sig "frjálslyndan félagshyggjuflokk" (skv. Wikipedia) og ég hef alla tíð (eftir að ég komst til vits og ára og kvaddi sósíalismann) aðhyllzt frjálslynda félagshyggju eða félagslega frjálshyggju. Samt hef ég aldrei átt neina samleið með þessum flokki. Þvert á móti hef ég lýst því yfir að fyrr myndi ég vilja drukkna í rotþró en að kjósa þennan flokk. Að vísu hef ég líka komið með svipaðar yfirlýsingar hvað varðar hina þrjá spilltu flokkana sem nú eru á Alþingi, sem ég á heldur enga samleið með.

[Gissur Jóhannesson (IP-tala skráð) 28.2.2011 kl. 09:54]

Ég held að Sigmundur Davíð sé lang skynsamasti maðurinn af öllum þeim sem nú sitja á Alþingi. Ég tel að Sigmundur Davíð sé  eini núverandi þingmaðurinn sem lært hefur af því hvert frjálshyggjufár síðustu ára var að fara með þjóðina. 

Frjálshyggjuna sem mynti helst á sögu Munkhásens sem taldi sig komast á einu Baunagrasi til Tunglsins.

Ég held líka að menn þurfi að átta sig á því að það er vandasamt verk að kasta grjóti í glerhúsi jafnvel þó menn séu ekki í Framsóknarflokknum.

[Guðjón Sigþór Jensson, 5.3.2011 kl. 10:53]

Nú fyrir stuttu var loksins ársreikningur Framsóknarflokksins vegna 2009 lagður fram. Í ljós kemur að flokkurinn er rekinn með tugmilljóna króna tapi þrátt fyrir háa styrki. Greinilegt er að þessi lög um fjármál stjórnmálaflokkana sem lögfest voru fyrir nokkrum árum virka vel en fram að þeim tíma voru fjármálin nánast „einkamál“ þeirra örfáu einstaklinga sem flokkunum stýrðu. Geta má sér nærri að margt var þar sem ekki mátti þola dagsins ljós enda þrífst spilling vel í skugganum af öðrum málum sem athyglinni er beint að hverju sinni.

Góðar stundir

Mosi